ដើម្បីសុក្ខភាព

ជឿ​ទេ​ថា​ថ្នាំ​បញ្ចុះ​កូ​ឡេ​ស្តេ​រ៉ុល Statin អាច​បង្កើន​ជីវិត​ផ្លូវភេទ​របស់​អ្នកជំងឺ​បេះ​ដូង​បាន​?

០១-មករា-២០០១ ០៧:០០ ព្រឹក

តាម​ការស្រាវជ្រាវ​បានអោយដឹងថា ថ្នាំ Statin អាច​បង្កើន​មុខងារ​នៃ​ការឡើង​រឹង​របស់​លិង្គ​បុរស​ដែល​កំពុងតែ​មាន​ជំងឺ​បេះដូង​-​សរសៃឈាម​បាន​។​

​ការស្រាវជ្រាវ​ដែល​ធ្វើឡើង​ដោយ​សាលា​វេជ្ជសាស្ត្រ Rutgers Robert Wood Johnson Medical School បាន​រកឃើញថា ថ្នាំ​ដែល​ចេញ​ដោយ​វេជ្ជបញ្ជា​ឈ្មោះថា Statin សម្រាប់​បញ្ចុះ​កូ​ឡេ​ស្តេ​រ៉ុល និង​បន្ថយ​ឱកាស​កើត​ជំងឺ​គាំងបេះដូង និង​ដាច់​សរសៃឈាម​ខួរក្បាល ក៏​ជួយ​សម្រួល និង​បង្កើន​មុខងារ​នៃ​ការឡើង​រឹង​របស់​លិង្គ​បុរស​បានដែរ​។ លោក ច​ន ប៊ី កូ​ស្ទី (John B. Kostis) សាស្ត្រាចារ្យ​ខាង​ជំងឺ​ទូទៅ និង​ជា​នាយក​វិទ្យាស្ថាន​ជំងឺ​បេះដូង​-​សរសៃឈាម​នៅឯ​សាលា​វេជ្ជសាស្ត្រ Rutgers Robert Wood Johnson Medical School និយាយថា បុរស​វ័យ​ចំណាស់​ដែល​មាន​សុខភាព​បេះដូង​-​សរសៃឈាម​ចុះខ្សោយ​, ជំងឺ​ទឹកនោម​ផ្អែម ឬ​ជំងឺ Metabolic Syndrome ច្រើន​តែ​ជួយ​បញ្ហា​ងាប់​លិង្គ ហើយ​អត្រា​នៃ​ការកើនឡើង​ជំងឺ​ទាំងនេះ​ក៏​ត្រូវបាន​គេ​រំពឹងទុក​ថា​នឹង​កើន​ឡើង​ដែរ​។​

​គាត់​និយាយ​ថា ការស្រាវជ្រាវ​នេះ​បញ្ជាក់​អោយដឹងថា តាម​ការវិភាគ ថ្នាំ Statins មិន​ត្រឹមតែ​ជួយ​បង្កើន​សុខភាព​បេះដូង​-​សរសៃឈាម និង​បន្ថយ​ការ​ប្រឈម​ជំងឺ​ដាច់​សរសៃឈាម​ខួរក្បាល និង​គាំងបេះដូង​ប៉ុណ្ណោះ​ទេ តែ​ក៏​អាច​ពង្រឹង​ដល់​មុខងារ​ឡើង​រឹង​របស់​លិង្គ​បុរស​បានដែរ​។​លោក កូ​ស្ទី បន្តទៀតថា បញ្ហា​ងាប់​លិង្គ​ប្រហែល​ដើរតួ​ជា​សញ្ញា​ប្រកាស​អាសន្ន​របស់​ជំងឺ​បេះដូង​-​សរសៃឈាម​។ ដូច្នេះ​ចំពោះ​អ្នកជំងឺ​បេះដូង ការចេញ​ថ្នាំ Statins អោយប្រើ​អាច​តាមដាន​លើ​ជំងឺ​បេះដូង​-​សរសៃឈាម​ផង និង​ផ្តល់​អត្ថប្រយោជន៍​បន្ថែម​ទាន់​ពេល​ដល់​ការពង្រឹង​មុខងារ​ផ្លូវភេទ​ផង៕